काठमाडौंबाट गरिबी लखेट्ने हो, गरिब होइन : केपी ओली

काठमाडौं । नेकपा एमालेका अध्यक्ष केपी शर्मा ओलीले गरिबलाई नलखेट्न काठमाडौं महानगरपालिकालाई सुझाव दिएका छन् । महानगरबाट गरिब नभई गरिबी लखेट्नुपर्ने उनको भनाइ छ ।

काठमाडौं महानगरपालिकाका फुटपाथमा व्यवसाय गर्दै आएकाहरुलाई विना व्यवस्थापन हटाइएपछि विरोध भइरहेका बेला ओलीले सामाजिक सन्जालमा लेखेका छन्, ‘हामीले महानगरबाट गरिबी लेखेट्नुपर्छ, गरिब होइन ।’

‘हो, फुटपाथ हिँड्नकै लागि हो। पैदल यात्री सहज रूपमा हिँडून् भनेर नै फुटपाथ बनाइएको हो। यसमा कसैको दुईमत छैन होला, मेरो पनि छैन,’ ओलीले लेखेका छन्, ‘मुख्य कुरा परम्परादेखि फुटपाथमा रोजिरोटीका लागि व्यापार गरिरहनुभएका मानिसहरुको व्यवस्थापन कसरी गर्ने भन्ने मात्रै हो।’  

फुटपाथ (सडक) व्यापार हाम्रो परम्परागत नेवारी व्यापार संस्कृतिको अंश भएको बताउँदै उनले असन, इन्द्रचोक, भोटाहिटीतिर ५०औं वर्ष अघिदेखि यस्तो चल्दै आएको बताए। ‘पुराना किताब, इतिहास र कथाहरूमा असन, इन्द्रचोकको व्यापारका विषयमा पढ्न पनि पाइन्छ। हो, अहिले परम्परागत रुपमा चल्दै आएको कुरालाई एक्कासि परिवर्तन गर्न खोज्दा केही खल्बली हुनु स्वभाविक र वैज्ञानिक पनि हो,’ ओलीले भनेका छन्।

काठमाडौंकी उपमेयर सुनिता डंगोलले नागरिक जवाफदेहिताको माग सहित आन्दोलनमा रहेका अभियन्ता ई: लाई भेटेको प्रसंग उल्लेख गर्दै एमाले अध्यक्ष ओलीले भनेका छन्, ‘अभियन्तालाई उपमेयरले भेट्नु भएको भन्ने सुनें। यो वार्ताबाट समाधान खोज्ने संकेत हुन सक्छ। दुवै युवा हुनुहुन्छ, छलफल गर्नुहोस्, समाधन निकाल्नुहोस्।