सर्वोच्च अदालतका मुख्य रजिष्ट्रार र रजिष्ट्रार उच्च अदालतको न्यायाधीशमा सिफारिस

काठमाडौं– सर्वोच्च अदालतका मुख्य रजिष्ट्रार लालबहादुर कुँवर र रजिष्ट्रार निर्मला पौडेल (भट्टराई) उच्च अदालतको न्यायाधीशमा सिफारिस भएका छन्। 

न्यायपरिषद्को आइतवार बसेको बैठकले कुँवरलाई न्यायाधीश बनाउने निर्णय गरेको हो । सर्वोच्चकै रजिस्ट्रार निर्मला पौडेल भट्टराई उच्च अदालत पोखराको न्यायाधीशमा सिफारिश भएकी छन् ।कुँवरलाई यसअघि पाटनकै न्यायाधीशमा सिफारिश गरिए पनि उनले अस्वीकार गरेका थिए ।

यसअघि दीपककुमार कार्की सर्वोच्च अदालतको कामु प्रधानन्यायाधीश भएका बेला पनि कुँवर उच्च अदालतको न्यायाधीशमा सिफारिस भएका थिए। त्यतिबेला उनले उच्च अदालतको न्यायाधीश पद अस्वीकार गरेका थिए।

यसपटक भने कुँवरकै सहमतिमा उनलाई उच्च अदालत पाटनको न्यायाधीशमा सिफारिस गरिएको हो। 

सर्वोच्च अदालतका मुख्य रजिष्ट्रारहरुलाई उच्च अदालतको मुख्य न्यायाधीश सिफारिस गर्ने अभ्यास थियो। यसअघि नहकुल सुवेदी, राजन भट्टराइ र नृपध्वज निरौला सर्वोच्चको मुख्य रजिष्ट्रारबाट उच्च अदालतको न्यायाधीश भएकोमा सुवेदी र निरौला सिधै मुख्य न्यायाधीशमा सिफारिस भएका थिए।