मेयर रिना साहद्वारा छोरीहरूको बिहेमा सहयोग

रौतहट २० पुस। मौलापुर नगरपालिकाकी मेयर रीना कुमारी साहले ५० जना परिवारलाई जनही ३० हजारको दरले चेक हस्तान्तरण गरेकी छन् । रीना मेयर भएदेखि नै नगरपालिकाले ‘असहायके साथ मेयर कार्यक्रम’ सञ्चालन गर्दै आएको छ । जसअनुसार नगरपालिकाले गरिब समुदायका महिलाहरुको बिहेवारीमा परिवारलाई जनही ३० हजार रुपैयाँ अनुदान सहयोग गर्दै आएको हो । सोही कार्यक्रम अनुसार बिहीबार ५० जनाका परिवारलाई रू ३० हजारको दरले अनुदान रकमको चेक हस्तान्तरण गरिएको साहले जानकारी दिइन् ।
एक बिशेष समारोहबीच चेक हस्तान्तरण कार्यक्रममा लाभग्राहीहरुले खुसी व्यक्त गरेका थिए ।
मेयर साहको पहलमा झण्डै ६ वर्ष देखि शुरू भएको यो कार्यक्रमले आम गरिब परिवारलाई ठुल्लो राहत प्रदान गरेको नगरपालिकाले जनाएको छ । हालसम्म यो कार्यक्रमबाट सयौँ लाभान्वित भइसकेका छन् । यसैगरी नगरपालिकाले जनतासँग जोडिएर अन्य विभिन्न कार्यक्रम सञ्चालन गर्दै आएको छ ।