कर्मचारी सञ्चयकोषले दिने स्वास्थ्य उपचार सुविधा अब सञ्चयकर्ताको दम्पतीले नै पाउने

कर्मचारी सञ्चयकोषले यस अघि सञ्चयकर्तालाई मात्रै दिने गरेको स्वास्थ्य उपचार सुविधा अब सञ्चयकर्ताको दम्पतीले नै पाउने गरि व्यवस्था गरेको छ ।

फागुन १ गतेदेखि लागू हुने गरि कोषले सञ्चयकर्ताको पति वा पत्निलाईसमेत उपचार सुविधा समावेश गरेको जानकारी दिएको हो । कोषले साधारण रोगको हकमा प्रत्येक वर्ष बढिमा रु. १ लाख र घातक रोगको हकमा सेवा अवधिभरमा रु. १० लाखसम्म स्वास्थ्य उपचार सुविधा उपलब्ध गराउँदै आएको छ ।

यसैगरी सोही मितिदेखि लागू हुने गरी सञ्चयकर्ताले उपचार गराउने अस्पतालहरुको सूची तयार गरिएको र सो सूचीमा उल्लिखित अस्पतालहरुमा उपचार गराएको हकमा मात्र स्वास्थ्य उपचार सुविधा उपलब्ध गराईने पनि जनाइएको छ । स्वास्थ्य उपचार सुविधा कोशी प्रदेशका १५, मधेश प्रदेशका ९, बाग्मती प्रदेशका ६०, गण्डकी प्रदेशका १५, लुम्बिनी प्रदेशका १६, कर्णाली प्रदेशका २ र सुदूरपश्चिम प्रदेशका तीन अस्पतालबाट लिन सकिनेछ ।