नेप्से संगै कारोबार रकम सामान्य बढ्यो

काठमाडौं । मंगलबार नेपाल स्टक एक्सचेञ्ज (नेप्से) परिसूचक बढेर बन्द भएको छ। अघिल्लो कारोबार दिनको अन्तिम समयमा बढेको नेप्सेले यस दिन पनि सोही क्रमलाई निरन्तरता दिएको हो। आज नेप्से ९.४४ अंकले बढेर दुई हजार ८५ दशमलव ७१ विन्दुमा बन्द भएको हो ।

आज २ अर्ब ५९ करोड १५ लाख ३४ हजार रुपैयाँ बराबरको कारोबार भएको छ । आज कारोबार भएका कम्पनीमध्ये १८१ वटाको बढेको छ भने ५७ वटा कम्पनीको शेयरमूल्य घटेको छ । बाँकी ९ कम्पनीको शेयरमूल्य स्थिर रहेको छ । 

नेप्सेका अनुसार आज दुई कम्पनीको शेयरमूल्यमा उच्च वृद्धि भएको छ । आज समाज लघुवित्त वित्तीय संस्था लिमिटेडको शेयरमूल्य ९.९९ प्रतिशतले बढेर प्रतिकित्ता ७६३ रुपैयाँ पुगेको छ । यसका साथै आज गुरास लघुवित्त वित्तीय संस्था लिमिटेडको शेयरमूल्य ९.४२ प्रतिशतले बढेर प्रतिकित्ता ९७८ रुपैयाँ पुगेको छ ।

त्यस्तै, सामलिङ पावर कम्पनी लिमिटेडका लगानीकर्ताहरूले सर्वाधिक गुमाएका छन् । यस कम्पनीको शेयरमूल्य आज १० प्रतिशतले घटेको छ । कारोबार रकमका आधारमा यस दिन पनि हिमालयन रि इन्स्योरेन्स शीर्ष स्थानमा रहेको छ। सो कम्पनीको यस दिन ३३ करोड ७६ लाख रुपैयाँ बराबरको शेयर खरिदबिक्री भएको छ। त्यस्तै, यस दिन माउन्टेन इनर्जीको कारोबार रकम साढे १६ करोड नाघेको छ।