July 18, 2024
काठमाडौं। सांसदहरुले शिक्षकको एउटै पेशागत संगठन भए हुने धारणा राखेका छन्, तर दलनिकटका शिक्षक संगठन खारेज गर्न शीर्ष राजनीतिक नेतृत्व सहमत हुनुपर्ने बताएका छन् ।
बिहीबार प्रतिनिधि सभाको शिक्षा, स्वास्थ्य तथा सूचना प्रविधि समितिमा विद्यालय शिक्षा विधेयकमाथिको छलफलमा धेरैजसो सांसदहरुले शिक्षकको एउटै पेशागत संगठन भए हुने धारणा राखेका छन् ।
एमाले सांसद रघुजी पन्तले शिक्षकहरूको एउटै संगठन भए हुने बताए । तर यसमा दलहरूको फरक फरक मत भएकाले यो विवाद शीर्ष राजनीतिक तहबाट टुङ्ग्याउनुपर्ने बताए ।
शिक्षा समितिमा रहेको विद्यालय शिक्षा विधेयकमा शिक्षकको एउटै ट्रेड युनियन रहने व्यवस्था छ । तर शिक्षकको दल निकट संगठनहरुले भने आफूहरूले संविधानले नै अधिकार दिएको भन्दै विधेयकको व्यवस्थाको विरोध गरेका छन् ।
राष्ट्रिय प्रजातन्त्र पार्टीका सांसद बुद्धिमान तामाङले पेशागत हितको लागि एउटा संगठन हुनुपर्ने तर दलीय शिक्षक संघ संगठनहरु खारेज गर्नुपर्ने धारणा राखे ।
स्वतन्त्र सांसद अमरेशकुमार सिंहले शिक्षकहरू दलीय राजनीतिमा सहभागी भएकाले नै विद्यालय शिक्षाको अवस्था खस्किएको बताए ।
माओवादी केन्द्रका सांसद माधव सापकोटाले भने शिक्षकहरूलाई संघ संगठन खोल्न प्रतिबन्ध लगाउन नहुने बताए ।
बिहीबारको छलफलमा सांसदहरुले निजी विद्यालयलाई शैक्षिक गुठीमा जान बाध्यात्मक व्यवस्था राख्ने कि नराख्ने भन्ने विषयमा पनि छलफल गरेका छन् ।
प्रकाशित मिति:July 18, 2024
