सिमलताल घटनाः हराएको बस र यात्रुको खोजीका लागि भारतको रेस्पोन्स फोर्स नेपाल आइपुग्यो

काठमाडौं । मिलतालमा पहिरोसँगै त्रिशुलीमा खसेको दुई बस र यात्रुको खोजीका लागि भारतको नेसनल डिजास्टर रेस्पोन्स फोर्स (एनडिआरएफ) घटना स्थल आइपुगेको छ । नारागणगढ–मुग्लिन सडकखण्डअन्तर्गत पर्ने उक्त स्थानमा एनडिआरएफ को १२ सदस्यीय टोली घटनाको खोज तथा उद्धारका लागि नेपाल आएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।

टोली गएराति सुनौली नाका हुँदै नेपाल भित्रिएको भैरहवामा बसेर आज बिहानै घटना स्थलमा आएको हो । टोलीले आजैदेखि काम थाल्ने छ ।

पानीमुनि खोजतलासमा प्रयोग हुने यन्त्र उपकरणलगायत सेटसहित उनीहरु आएका हुन् । उनीहरुले तीन वटा अत्याधुनिक सोनार उपकरण पनि ल्याएका बताइएको छ । उनीहरु सशस्त्र प्रहरीको एक टोलीका साथ घटनास्थल पुग्दै छन् । कार्यकारी प्रमुख पोखरेलका अनुसार नेपालको स्रोतसाधनले बसको अवस्था पत्ता लगाउन नसकेपछि सरकारले खोजीका लागि अन्तर्राष्ट्रिय उद्धार टोली मगाएको हो । गृह मन्त्रालयले परराष्ट्रमार्फत भारतीय उद्धार टोली मगाएको थियो ।