पूर्वमुख्यमन्त्रीले सचिवलाई ‘शौचालयमा थुन्छु’ भन्दै धम्की दिएपछि…

काठमाडौं । कोशी प्रदेशका पूर्वमुख्यमन्त्री केदार कार्कीले मन्त्रालयका एक सचिवलाई कुटपिटको धम्की दिएको खुलासा भएको छ । आफुलाई धम्की आएको भन्दै सामाजिक विकास मन्त्रालयका सचिव लक्ष्मीप्रसाद भट्टराईले आफूलाई कुट्ने धम्की दिएको भन्दै जिल्ला प्रशासन कार्यालय मोरङमा उजुरी दिएका छन् ।

सोमबार ४ः५३ मिनेटको समयमा फोन गरेर आफूलाई धम्की दिएको उनले उजुरीमा उल्लेख गरेका छन् ।

भुक्तानीको विषयलाई लिएर फोनमार्फत पूर्व मुख्यमन्त्री कार्कीले ‘कुट्छु, शौचालयमा थुन्छु’ लगायतको धम्की दिएको सचिव भट्टराईले बताएका छन् ।

सचिव भट्टराईका अनुसार पूर्व मुख्यमन्त्री कार्कीले विभिन्न गोल्डकपहरूलाई रकम निकासा गर्न दबाब दिएका थिए । तर, आर्थिक मामिला तथा योजना मन्त्रालयले भुक्तानीका लागि सहमति नदिएपछि आफूले निकासा दिन नसक्ने जानकारी गराउँदा कार्कीले धम्की दिएको उनको भनाइ छ ।