उद्योगीले विद्युतको बक्यौता जुनसुकै हालतमा तिर्नै पर्छः सभापति खतिवडा (भिडिओ)

काठमाडौं । संसदीय राज्य व्यवस्था समितिका सभापति रामहरि खतिवडाले उद्योगीहरुले विजुलीको महशुल जुनसुकै हालतमा बुझाउनु जिकिर गरेका छन् । तराई विकास तथा सञ्चार केन्द्र काठमाडौंले आयोजना गरेको सुशासनको क्षेत्रमा देखिएका चुनौती विषयक छलफल कार्यक्रममा विवादमा रहेको डेडिकेटेट र ट्रङ्कलाईनको विषयमा बोल्दै खतिवडाले जनतालाई अध्यारोमा राखेको तर उद्योगीहरुलाई विजुली दिएको र त्यसवापतको रकम जुनसुकै हालतमा बुझाउनुपर्ने अडान लिएका हुन् ।

प्रतिनिधिसभा र समितिमासमेत उनले नेपाल विद्युत प्राधिकरणले विल तिर्न ताकेता गर्नु र लाईन काट्नु जायज भएकोसमेत बताउदै आएका छन् । उनले अविलम्ब उद्योगीहरुले महसुल बुझाउनु पर्ने विषय उठाउदै आएका हुन् ।

उनले भने– ‘कसैको पनि आट होला ? नेपाली जनताहरु १८ घण्टा अन्धकारमा बसेका वेला २४ घण्टा उद्योग धन्दालाई विजुली दिने अनि त्यो वापतको पैसा दिनुहोस् भन्दा पैसा दिनौं भन्ने ? जति प्रयोग गरेको छ प्रयोग गरेको सबै पैसा व्यापारीहरुहरुले बुझाउनै पर्छ । विभिन्न वाहानामा यसलाई रोक्न पाइदैन ।’

२/४ हजार रकम नदिर्ता लाइन काटिने तर लाखौं करोडौं हुँदै अर्व पुगेपछि जोडिने पद्दतीको विकास हो भने त्यसले सुशासनको अनुभुति नदिने खतिवडाको जिकिर थियो ।

अर्को प्रसंगमा वर्तमान सरकारले भ्रष्टचारका विषयमा हदबन्धी राख्ने प्रावधान ल्याउन खोजेको भन्दै खतिवडाले असन्तुष्टि व्यक्त गरेका छन् ।

खतिवडाले भने– ‘जनतामा निरासा छ । दुई वटा ठूला पार्टी मिलेर वर्तमान सरकार निर्माण भएको छ । नयाँ सरकारका प्रधानमन्त्रीले आफु नियुक्त भइरहदा पहिलो प्रतिवद्धता प्रधानमन्त्री ज्युले देशलाई शुसासन दिने परिकल्पनाका कुराहरु गर्नु भएको छ । म उहाँलाई शुभकामना दिन चाहन्छु । काम अब ढिला नगरी गर्न अनुरोध गर्दछु ।’
उनले कार्यकारी प्रमुख, संस्थाका प्रमुख, विभागीय प्रमुख, मन्त्रालयका प्रमुखहरु जो हुनुहुन्छ आफ्नो ठाउँबाट कानुन संवत रुपमा जनतालाई दुःख नदिने गरी सहि निर्णय गर्ने हो भने शुसासन टाढा नभएको बताएका छन् ।

उनले विगतमा भएको एनसेल काण्डको विषय स्मरण गर्दै जसले बदमासी गर्छ त्यो नै पहिले सबै नेतृत्वमा पुग्ने गरेको बताए । सोहि कारण काम गर्ने वातावरण सृजना गर्न अफ्ठेरो रहेको पनि उनले बताएका छन् ।