शाखा अधिकृतद्धारा आविष्कार केन्द्रलाई २ लाख सहयोग

काठमाडौँ । नेपाल सरकारका शाखा अधिकृतहरूको समूह ब्याच २०७३ ले राष्ट्रिय आविष्कार केन्द्रलाई २ लाख ७८ हजार तीन सय २१ रुपैयाँ सहयोग गरेको छ । समूह ब्याच २०७३ ले आफ्नो कार्तिक २ गते परेको चौथो वार्षिकोत्सवका अवसरमा सहयोग गरेको हो ।

कोभिड—१९ महामारीको समयमा स्वास्थ्य उपकरण तथा स्वास्थ्यकर्मीले प्रयोग गर्ने सामग्रीहरू बनाई महामारीविरुद्ध जुध्न सहयोग गरेको र आविष्कार केन्द्रमा सृजनात्मकता प्रवर्द्धनका लागि गरेको कार्यको प्रशंसा गर्दै समूहले सोही आर्थिक सहयोग गरेको हो ।

कोभिड–१९ प्रकोपका कारण अरू कार्यक्रम गर्न सम्भव नभएकाले विद्युतीय माध्यमबाट ब्याट समूहभित्रै स्वैच्छिक रूपमा रकम सङ्कलन गरिएको र प्रतिनिधिमूलक छरितो समूह बनाई सहयोग हस्तान्तरण गरिएको थियो । हस्तान्तरण कार्यक्रममा शाखा अधिकृतहरू भिमकुमार बस्नेत, होमनाथ काफ्ले, विष्णु हरी रेग्मी, सुमन अधिकारी र गोविन्द पौडेलले प्रतिनिधित्व गरेका थिए ।