अध्यक्ष माधव नेपाल सहित एकीकृत समाजवादी पक्षका ३२ सांसद र ६० केन्द्रिय सदस्य चन्द्रागिरीमा
८ भाद्र २०७८, मंगलवार
काठमाडौँ । प्रतावित नेकपा (एकीकृत समाजवादी) पार्टीका अध्यक्ष तथा वरिष्ठ नेता माधव नेपाल सहित ३२ सांसद र ६० केन्द्रिय सदस्यको जमात चन्द्रागिरी हिल्स रिसोर्ट पुगेका छन् । सनाखतका लागि निर्वाचन आयोगले बोलाएको अघिल्लो दिन नयाँ दल दर्ताका लागि माधव नेपाल समुहका सोही नेताहरु चन्द्रागिरी हिल्स रिसोर्ट पुगेका हुन्।
निर्वाचन आयोगले बुधबार नेपाल पक्षलाई सनाखतका लागि बोलाएको छ ।
राष्ट्रिय सभा र प्रतिनिधी सभाका ३२ सांसद चन्द्रागिरी हिल्स रिसोर्टमा बास बस्न पुगेका छन् । त्यस्तै, साविक एमालेको २०३ केन्द्रिय सदस्यमध्ये ६० जना सदस्य चन्द्रागिरी हिल्स गएका हुन् ।
नयाँ दल दर्ताको तयारी भइरहेका बेला आफू पक्षका नेताहरूको आगामी कार्यभार र मार्गको बारेमा छलफल गर्ने उद्देश्यले उनीहरूलाई एकान्तवासमा लगिएको हो ।
मंगलबार थप एक दर्जन जति केन्द्रिय सदस्य र आधा दर्जन सांसद थपिने पनि नेपाल निकट नेताहरुले बताएका छन् । एमाले विभाजन गरि नेकपा(एकिकृत समाजवादी) पार्टी गठनका लागि ३१ जना सांसद वा ४१ जना केन्द्रिय सदस्य आवश्यक पर्छ ।
