December 1, 2021
सडकमा हरेक दिन १ लाख कार्यकर्ता उतार्न सकेको दिन राजा नारायणहिटीमा
काठमाडौं-राप्रपाका अध्यक्ष कमल थापाले सडकमा हरेक दिन १ लाख कार्यकर्ता उतार्न सकेको दिन राजालाई नारायणहिटीमा ल्याएर राख्ने चेतावनी दिएका छन्।
उनले जुन दिन राप्रपाले संसदमा सम्मानजनक स्थान र सडकमा हरेक दिन १ लाख उतार्न सक्छ त्यही दिन जनताले राजा ल्याउने बताएका हुन्।
मंगलबार राप्रपाको एकता महाधिवेशनमा बोल्दै थापाले राजा ल्याउन दुई तिहाई बहुमत आवश्यकता नपर्ने बताएका हुन् ।
उनले हिन्दू राष्ट्रको स्थापनामा दुई तिहाई नचाहिने दाबी समेत गरेका छन् ।
हिन्दू राष्ट्रको पक्षमा अरु दलहरु पनि रहेकाले एक ठाउँमा आएर हुनसक्ने उनको तर्क थियो।
एउटा चुनाव हार्दैमा वा पदमा हार्दैमा राप्रपा नसकिने उनको जिकिर थियो ।
कुनै हीन भावना कार्यकर्ताले राख्न जरुरी छैन, नेपाली कांग्रेस कुनै समय दुई तिहाईको पार्टी थियो अहिले कहाँ पुग्यो, अहिले माओवादी खुम्चेर कुन अवस्था आएको छ, त्यसबाट सिक्न जरुरी छ।’ उनले भने
भारतीय जनता पार्टीको उदाहारण दिँदै उनले राप्रपाको सफलता एउटा चुनावले नहुने दाबी गरे।
निर्वाचनको मुखमा पार्टी विभाजन हुनु र कांग्रेससँगको सहकार्यमा इमान्दारिता नभएको कारण कमजोर भएको उनले दाबी गरे।
पार्टी विभाजन नभएको भए राप्रपा ठूलो शक्तिको रुपमा हुने कुरामा आफ्नो कमजोरी भएको भन्दै थापाले अब शक्तिशाली भएर उदाउने दाबी गरे ।
प्रकाशित मिति:December 1, 2021
