पल शाहविरुद्ध अर्को जबरजस्ती करणीसम्बन्धी जाहेरी

काठमाडौं-अभिनेता पल शाहविरुद्ध अर्को जबरजस्ती करणीसम्बन्धी जाहेरी निवेदन परेको छ ।

इलाका प्रहरी कार्यालय, गैंडाकोटमा अर्को किटानी जाहेरीका लागी निवेदन परेको प्रहरी कार्यलयले बताएको छ ।

आइतबार अभिनेता पल शाहविरुद्ध जबरजस्ती करणीसम्बन्धी कसूरमा अर्को किटानी जाहेरीको निवेदन परेको हो ।

प्रहरीका अनुसार गैंडाकोटकी युवतीले लगेको जाहेरीमा ७ चैतमा नवलपरासीको गैंडाकोट रिसोर्टमा सुटिङका बेला जबरजस्ती करणी भएको दाबी गरिएको छ ।

आफन्तहरूसहित पुगेकी युवतीले एकदिनमा सकिने काममा जबरजस्ती करणी गर्ने उद्देश्यले थप एक दिन बस्न शाहले लगाएका जाहेरीमा बताएकी छिन् ।

प्रहरीले जाहेरीमा उल्लेख भएका विवरण अध्ययनपछि मात्रै दर्ता हुने टुंगो लाग्ने बताएको छ ।

जिल्ला प्रहरी कार्यालय, तनहुँमा ११ फागुनमा एक गायिकाले शाहविरुद्ध जबरजस्ती करणीको कसूरमा किटानी जाहेरी दिएकी थिइन् ।

लगत्तै जिल्ला अदालत, तनहुँबाट पक्राउ पूर्जी लिएर प्रहरीले शाहको खोजी थालेको थियो ।

आइतबार शाह आफैं तनहुँ प्रहरीमा हाजिर भएका छन् ।

उनी हाजिर भइसकेपछि गैंडाकोटमा जाहेरी दर्ता हुन लागेको हो ।