May 9, 2022
काठमाडौं-स्थानीय निकायको निर्वाचनमा नेपाल नेतृत्वको दल नेकपा एस निर्णायक शक्तिका रुपमा देखिएकाे छ ।
नेकपा एकीकृत समाजवादी पार्टीका अध्यक्ष माधवकुमार नेपाल फेरि निर्णायक शक्तिका रुपमा देखिएका हुन् ।
स्थानीय निकायको निर्वाचनमा नेपाल नेतृत्वको दल नेकपा एसले खेल्ने भूमिकाले देशभरको चुनावी परिणाममा ठूलै उथलपुथल ल्याउने अवस्था बनेको छ ।
गठबन्धनले देशभर तालमेल गरेको छैन । महानगरपालिका, उपमहानगरपालिकाका अलावा ७५३ मध्ये आधाभन्दा कममा तालमेल गरेको छ ।
यसले देशभरको चुनावी नतिजामा फरक परिणाम ल्याउन सक्छ ।
महानगरपालिका र उपमहानगरपालिकाको प्रतिष्पर्धामा एकातर्फ गठबन्धनको दल विशेषले प्रमुख र उपप्रमुखमा उम्मेदवार खडा गरेका छन् ।
अर्कातर्फ एमाले प्रतिष्पर्धी देखिएको छ । एमाले फुटेर नेकपा एस बनेको छ । एसको मत जता जान्छ उसकै पल्लाभारी हुने धेरै पालिकाहरु छन् ।
एसको कार्यकर्ताको सक्रियता र मत नै चुनावमा जित या हारको निर्णायक बन्न सक्छ । त्यसैले माधव नेपाल उचित समयको पर्खाइमा देखिन्छन् ।
नेकपा एसमा अधिकांश एमालेका पुराना र परिश्रमी कार्यकर्ता छन् । पालिकाको तल्लो तहसम्मको समाज बुझेकाहरु थोरै संख्यामा भएपनि प्रभाव पार्ने खालका छन् । उनीहरुको सक्रियता कस्तो हुन्छ भन्ने चासो देखिएको ।
विगतमा केपी शर्मा ओली नेतृत्वको सरकार ढाल्न माधव नेपाल नै निर्णायक बनेका थिए ।
शेरबहादुर देउवालाई प्रधानमन्त्री बनाउने देखि प्रदेशहरुमा एमाले नेतृत्वको सरकार ढालेर गठबन्धनको सरकार बनाउन पनि उनकैको भूमिका निर्णायक थियो ।
त्यसपछि भएका राष्ट्रियसभाको चुनावमा पनि माधव नेपाल नै निर्णायक बने ।
यसपटक स्थानीय चुनावमा पनि माधव नेपाल नेतृत्वको नेकपा एस देशका प्रायः पालिकाहरुमा निर्णायक देखिएका छन् ।
विगतमा एउटै दल भएको भन्दै उम्मेदवार नउठाएको स्थानमा एसका मतदाता सूर्यमै मतदान गर्नसक्ने विषय पनि नउठेको होइन ।
कतिपय पालिकामा एसले जित्ने सम्भावित भए एमालेका मतदाताको मत पनि जान सक्छ । यसकारण पनि एस निर्णायक शक्ति बनेको छ ।
प्रकाशित मिति:May 9, 2022
