निमावि तहको १८३ विज्ञान शिक्षक पद रिक्त

काठमाडौँ । शिक्षक सेवा आयोगले निम्न माध्यामिक तह तृतीय श्रेणी पदको विज्ञान विषय शिक्षकको लिखित परीक्षाको नतिजा सार्वजनिक गरेको छ ।

आयोगले २०७८ चैत १७ गते र २०७९ असार ११ गते लिइएको खुला प्रतियोगितात्मक (सामान्य र विषयगत) लिखित परीक्षा सञ्चालन गरेको थियो ।

आयोगले प्रदेश-१ मा १०१ रिक्त दरबन्दीको लागि लिएको परीक्षामा जम्मा ४१ जना, मधेस प्रदेशमा ३५ रिक्त दरबन्दीको लागि ७ जना मात्रै उत्तीर्ण, बागमती प्रदेशमा १०० रिक्त पदका लागि जम्मा ५७ जना मात्रै उत्तीर्ण भएका छन् ।

गण्डकी प्रदेशमा १०१ रिक्त पदको लागि ७३ जना उत्तीर्ण, लुम्बिनी प्रदेशमा ६० रिक्त पदको लागि ४७ जना, कर्णाली प्रदेशमा २९ जनाको लागि २१ जना र सुदूरपश्चिम प्रदेशको लागि ११ जना मात्रै उत्तीर्ण भएका छन् ।

आयोगले सबै प्रदेशमा ४४० रिक्त दरबन्दीको लागि सञ्चालन गरेको परीक्षामा २५७ जना मात्रै उत्तीर्ण भएका छन् । आयोगले माग गरेको रिक्त दरबन्दी र सार्वजनिक लिखित परीक्षाको नतिजा हेर्दा फेरि पनि १८३ पद रिक्त हुने देखिएको छ ।

आयोगको सूचना अनुसार उत्तीर्ण शिक्षकहरूको अन्तर्वार्ता मंसिर २८ गते सञ्चालन हुनेछ ।