विश्वकप छनोटमा नेपाल जिम्बाब्वेसँग ८ विकेटले पराजित

काठमाडौँ- आईसीसी पुरुष क्रिकेट विश्वकप छनोटअन्तर्गतको उद्घाटन खेलमा नेपाल पराजित भएको छ । समूह ‘ए’ अन्तर्गतको खेलमा नेपाल आयोजक जिम्बाब्वेसँग ८ विकेटले पराजित भएको हो ।

जिम्बाब्वेले टस जितेर फिल्डिङ रोजेपछि पहिले ब्याटिङ गरेको नेपालले निर्धारित ५० ओभरमा २९० रन बनाएको थियो। नेपालले दिएको २९१ रनको लक्ष्य जिम्बाब्वेले ४४ ओभर १ बलमा दुई विकेटको क्षतिमा पूरा गर्‍यो।

उसका लागि कप्तानर क्रेग इरभनले अविजित १२१ रन बनाए। त्यस्तै, सेन विलियम्सले १०२ रनको बनाए।  विस्ली माधिवेरीले ३२ र जोयलर्ड गुम्बिले २५ रन बनाए।

बलिङतर्फ नेपालका लागि सोमपाल कामी र गुलसन झाले समान एक/एक विकेट लिए।

पहिले ब्याटिङको गरेको नेपालले निर्धारित ५० ओभरमा ८ विकेट गुमाएर २ सय ९० रन बनाएको थियो। नेपालका कुशल भुर्तेलले ९९, आसिफ शेखले ६६, कुशल मल्लले ४१, कप्तान रोहित पौडेलले ३१ बनाएका थिए।

बलिङतर्फ जिम्बावेका रिचार्ड नगर्भाले चार, विलिङ्टन मासाकाट्जाले दुई तथा ब्लेसिङ मुजवानी र टेन्डी चताराले समान एक–एक विकेट लिए।