ललिता निवास प्रकरणमा भाटभटेनीका सञ्चालक मीनबहादुर गुरुङ पक्राउ

काठमाडौं । भाटभटेनी सुपरमार्केटका संचालक मीनबहादुर गुरुङ पक्राउ गरेका छन् । उनीसहित पाँच जनालाई नेपाल प्रहरी केन्द्रीय अनुुसन्धान ब्यूरो (सीईबी) ले उनलाई पक्राउ गरेको हो ।

ललिता निवासको २९९ रोपनी ३ आना सरकारी जमिन हिनामिना प्रकरणमा मुछिएका गुरुङलाई यसअघि विशेष अदालतले धरौटीमा रिहा गरेको थियो । न्यायाधीशद्वय प्रेमबहादुर कार्की र अब्दुल अजिज मुसलमानको संयुक्त इजलासले गुरुङलाई २०७७ सालमा दुई करोड रुपैयाँ धरौटीमा रिहा गर्न आदेश दिएको थियो ।

अख्तियारले गुरुङसँग ५० करोड ४७ लाख रुपैयाँको बिगो मागदाबी गर्दै विशेष अदालतमा मुद्दा दायर गरेको थियो । मुद्दा दायर भएको एक वर्षपछि उनी अदालतमा उपस्थित भएका थिए । प्रहरीले मंगलबार गुरुङलाई उनको निवासबाटै पक्राउ गरेको हो ।

यस्तै, मालपोत कार्यालय डिल्लीबजारका तत्कालिन प्रमुख कलाधर देउजा, कर्मचारी धर्मप्रसाद गौतम, सुरेन्द्रमान कपाली र हुपेन्द्रमणि केसीलाई सीआइबीले पक्राउ गरेको जनाएको छ ।

उनीहरुलाई सरकारी कागज किर्ते गरेर सरकारी जग्गा हडपिएको अनुसन्धानबाट खुलेको सीआईबीले जनाएको छ । उनीहरुलाई काठमाडौंका छुट्टाछुट्टै स्थानबाट पक्राउ गरिएको हो ।