निर्माण व्यवसायी आन्दोलनमा, बालुवाटारमा धर्ना

काठमाडौं।नेपाल निर्माण व्यवसायी महासंघ सरकारले आर्थिक वर्ष सकिँदा पनि ठूलो रकम भुक्तान नगरेको भन्दै आन्दोलनमा उत्रिएको छ । रकम निकासको मागसहित धर्ना र विरोधका कार्यक्रम गर्दै आएको महासङ्घले सोमबार बिहान प्रधानमन्त्रीको सरकारी निवास अघि धर्ना दिएको हो ।

रकम भुक्तान माग र म्याद थप सम्बन्धी निर्णयको विरोधमा व्यवसायीहरू सेफ्टी हेलमेटसहित एक घण्टा धर्नामा सहभागि भए । यसअघि माइतीघर मण्डला सहितका स्थानमा धर्नामा बसेका उनीहरूले व्यवसायीले विभिन्न समस्या झेल्नुपरिरहेको गुनासो गरेका छन् ।

महासङ्घका अध्यक्ष रवि सिंहले राज्यको गैर जिम्मेवारपनका कारण बाध्य भएर आन्दोलन गर्नु परेको बताए । म्याद थप, भुक्तानीका बारेमा महासङ्घले गत फागुन देखि नै सरकारका सबै सम्बन्धित निकायको ध्यानाकर्षण गराउँदा आएपनि कुनै सुनुवाइ नभएपछि आन्दोलनमा उत्रिन बाध्य भएको अध्यक्ष सिंहले बताए ।

२०८० असार २१ मा म्याद थपको अमूर्त सूचना प्रकाशित गरिएको भन्दै त्यसलाई नमान्ने जनाउँदै आएका छन् । विगत एक वर्षमा वर्षा, क्रसर बन्द, महँगी, निर्वाचन, भुक्तानी अभावलगायतका कारणले काम हुन नसकेको जनाउँदै निर्माण व्यवसायी महासङ्घले सबै आयोजनाहरूको एकमुष्ट २०८१ असार मसान्तसम्म म्याद थप हुनुपर्ने माग गर्दै आएका छन् ।