चौधरीलाई घुस मुद्दामा सफाइ,  अकुत सम्पत्ति आर्जनमा दोषी ठहर

डिभिजन सडक कार्यालय विराटनगरका तत्कालीन प्रमुख तथा सिडिई जितेन्द्रकुमार चौधरी गैरकानुनी सम्पत्ति आर्जन मुद्दामा दोषी ठहर भएका छन् । विशेष अदालतले उनलाई घुस लिएको मुद्दामा भने सफाइ दिएको छ।

विशेष अदालतले आइतबार उनीविरुद्धका दुईवटा मुद्दाको फैसला गर्दै घुस लिएको आरोपमा सफाइ दिएको छ भने अकुत सम्पत्ति आर्जनमा दोषी ठहर्‍याएको हो ।

अख्तियार दुरुपयोग अनुसन्धान आयोगले २०७६ सालमा जितेन्द्रविरुद्ध मुद्दा दायर गरेको थियो । विशेष अदालतका अध्यक्ष टेकनारायण कुँवरसहित रामबहादुर थापा र रितेन्द्र थापको इजलासले चौधरीलाई गैरकानूनी सम्पत्ति आर्जनमा मात्र दोषी ठहर गरेको अदालतका प्रवक्ता धनबहादुर कार्कीले बताए । 

प्रवक्ता कार्कीका अनुसार चौधरीले २ करोड ४४ लाख ९३ हजार ७ सय ६५ रुपैयाँ अकुत सम्पत्ति आर्जन गरेको ठहर भएको छ । चौधरीले श्रीमती र छोराका नाममा सम्पत्ति जोडेको भन्दै जफत प्रयोजनका लागि उनीहरूलाई पनि प्रतिवादी बनाएर अभियोग पत्र दायर गरिएको थियो ।

स्रोत नखुलेको सम्पत्ति जफत हुने छ । चौधरीलाई हुने सजाय निर्धारणका लागि माघ १५ गतेलाई पेशी तोकिएको छ ।