काठमाडौँमा वायु प्रदूषण अत्यधिक बढ्यो, मास्क प्रयोग गर्न स्वास्थ्य तथा जनसङ्ख्या मन्त्रालयको सुझाव

काठमाडौँमा वायु प्रदूषण अत्यधिक बढ्यो, मास्क प्रयोग गर्न स्वास्थ्य तथा जनसङ्ख्या मन्त्रालयको सुझाव
काठमाडौँ । काठमाडौँमा वायु प्रदूषण अत्यधिक बढेपछि स्वास्थ्य तथा जनसङ्ख्या मन्त्रालयले मास्कको प्रयोग गर्न सुझाव दिएको छ । यहाँको वायु विश्वकै अस्वस्थकर सूचीको अग्रस्थानमा रहेको जनाउदै वायु प्रदूषणबाट जोगिन अनिवार्य मास्कको प्रयोग गर्न सुझाव दिएको हो ।
विश्वभरिको वायुप्रदूषणको अवस्था मापन गर्ने ‘वल्र्ड एयर क्वालिटी इन्डेक्स –याकिङ्ग’ अनुसार काठमाडौँको वायु विश्वकै अस्वस्थकरको सूचीमा अग्रस्थानमा छ ।
“वायु प्रदूषणले मुटु तथा रक्तनली, फोक्सो, मस्तिष्क, आँखा, नाक, कान, घाँटी आदिमा असर पुर्याउनुका साथै दम, क्यान्सर आदिको जोखिम पनि बढाउँछ । वायु प्रदूषणले गर्दा कम तौल भएको बच्चा जन्मने र अवधि नपुग्दै बच्चा जन्मने जोखिमसमेत हुन्छ,” मन्त्रालयका प्रवक्ता डा. प्रकाश बुढाथोकीले जारी गरेको विज्ञप्तिमा भनिएको छ ।
नेपालमा वायु प्रदुषणबाट बर्सेनि हुने मृत्युमा बढीजसो पाँचवर्ष मुनिका बालबालिका, गर्भवती, दीर्घ रोगी र वृद्धवृद्धा बढी छन् । यसले नेपालीको औसत आयु चार दशमलव एक प्रतिशतले घटाएको तथ्यांक छ ।
गर्मी समयमा तराईमा तातो हावा बहने र लू लाग्ने उच्च सम्भावना भएको हुँदा तातो हावा लागेको समयमा अनावश्यक बाहिर हिँडहुल नगर्न तथा झोलिलो पदार्थ पर्याप्त मात्रामा सेवन गर्न गराउनु हुन मन्त्रालयले अनुरोध गरेको छ ।
पछिल्लो समयमा साँझको बेला उपत्यका भित्रका तीनवटै जिल्लामा निकै उच्चरुपले ताते हावा चलेपछि सरुवारोगहरुको समस्या पनि बढ्दै गईरहेको छ ।