नेपाल प्रहरीका १४९ जना इन्स्पेक्टर दीक्षित

काठमाडौँ । नेपाल प्रहरीका १४९ जना प्रहरी निरीक्षक दीक्षित भएका छन् । आधारभूत तालिम पुरा गरेर उनीहरू दीक्षित भएका हुन् । दीक्षित हुनेमा १८ जना महिला र १३१ जना पुरुष छन् ।

राष्ट्रिय प्रहरी प्रशिक्षण प्रतिष्ठानमा शुक्रबार आयोजित दीक्षान्त समारोहमा प्रधानमन्त्री पुष्पकमल दाहाल ‘प्रचण्ड’ले प्रथम,  द्वितीय र तृतीय पुरस्कार प्रदान गरे । प्रशिक्षार्थी प्रहरी निरीक्षक पवन कुमार परियार प्रथम, सगुन खड्का  द्वितीय र आयुष ढुंगानाले तृतीय पुरस्कार प्राप्त गरेका छन् ।

दीक्षान्त समारोहलाई सम्बोधन गर्दै प्रधानमन्त्री प्रचण्डले विज्ञान र प्रविधिको विकास सँगै नयाँ सुरक्षा चुनौती थपिएको बताए । उपप्रधान एवं गृहमन्त्री रवि लामिछानेले पास आउट भएर कार्यक्षेत्रमा जान लागेका इन्स्पेक्टरहरुले इमानदार र व्यावसायिक भएर जिम्मेवारी निर्वाह गर्नेमा आफू विश्वस्त भएको बताए । उनले भने,‘अधिकृतहरू कहिलेकाहीँ बेलगाम हुँदा कार्यसम्पादनमा आँच आउने गरेको छ ।’