आफुले जिम्मेवारी सम्हाले यता प्राधिकरणलाई ८२ अर्ब नाफा कमाएको कुलमानको दाबी (पूर्णपाठ)

काठमाडौं । नेपाल विद्युत प्राधिकरणका प्रबन्ध निर्देशक कुलमान घिसिङले आफुले प्राधिकरणको जिम्मेवारी सम्हाले यता ८२ अर्ब रुपैयाँ नाफा गराएको दाबी गरेका छन् । दोस्रोपटक प्राधिकरणको जिम्मेवारीमा आएको तीन वर्ष पुगेको अवसरमा प्रगति विवरण पत्रकार सम्मेलन मार्फत सार्वजनिक गर्दै उनले ८ वर्ष अघि घाटामा रहेको प्राधिकरणलार्य सो रुपैयाँ नाफा गराएको दाबी गरेका हुन् ।

आज आयोजित पत्रकार सम्मेलनमा उनले आठ बर्ष अघि घाटामा रहेको प्रधिकरणको सञ्चित मुनाफा ४७ अर्ब ४१ करोड रहेको र पछिल्ला ८ वर्षमा ८२ अर्ब २ करोड नाफा पुगेको जनाएका दाबी उनको छ ।

प्राधिकरणको नाफा वास्तविक भन्दै कागजी मात्रै नभएको पनि उनले स्पष्टीकरण दिएका छन् । ८ वर्षमा ४७ अर्ब सञ्चित नाफा भएको उल्लेख गर्दै उनले कूल नाफा ८२ अर्ब पुगेको सुनाए । यो नाफा डेडिकेटेड र ट्रङ्कलाइन महसुलले मात्रै नभएको उनको भनाई छ ।

आफ्नो दोस्रो कार्यकालमा प्राधिकरणको वित्तीय अवस्थामा थप सुधार, संस्थाभित्रको सुशासन, हरेक नागरिक घरमा बिजुली पुर्याउन विद्युतीकरण, विद्युत आपूर्तिलाई पर्याप्त, भरपर्दो, गुणस्तरीय तथा सुरक्षित बनाउन प्रशारण र वितरणतर्फको संरचना विस्तार एवं सुदृढीकरण, उत्पादनतर्फका ठूला जलविद्युत आयोजना अगाडि बढाउने, आन्तरिक रुपमा खपत बढाउने तथा अतिरिक्त विद्युत निर्यातलाई उच्च प्राथमिकतामा राखेर काम गरेको कार्यकारी निर्देशक घिसिङले जानकारी गराए ।

आठ वर्षअघि २९ लाख ७० हजार रहेको विद्युत ग्राहक संख्या हाल सामुदायिकसहित ५९ लाख ३५ हजार पुगेको र बिकट बस्तीहरुको पहिचान गरेर बाँकी विद्युतीकरणको काम अगाडि बढिसकेको बताएका छन् ।