झलनाथ खनाल भन्छन्– ‘कांग्रेस र एमाले घमन्डी र भ्रष्ट पार्टी’

काठमाडौं । नेकपा(एकीकृत समाजवादी)का सम्मानित नेता तथा एवं पूर्वप्रधानमन्त्री झलनाथ खनालले कांग्रेस र एमाले घमन्डी र भ्रष्ट पार्टीभएको बताएका छन् ।

आइतबार काठमाडौंमा आयोजित पार्टी केन्द्रीय सदस्यहरूको शपथग्रहण कार्यक्रममा उनले नेपालमा दुई पार्टी सिस्टम ल्याउने कुरा कल्पनामा मात्र सीमित हुने टिप्पणी गरेका छन् ।

नेपालमा दुई पार्टी ‘सिस्टम’ आउने सम्भावना नरहेको उनको जिकिर थियो । नेपाली कांग्रेस र नेकपा (एमाले) नेतृत्वको सत्ता गठबन्धनलाई दलाल पुँजीवाद र दक्षिणपन्थी अवसरवादको संज्ञा दिँदै उनले उनीहरूले दुई पार्टी सिस्टम ल्याउने धृष्टता गरे पनि त्यो सम्भव नहुने जिकिर गरे ।

खनालको भनाइ –
दुईवटा पार्टीको सरकार बनेको छ । यी दुई घमन्डी पार्टीहरू हुन् । भ्रष्ट पार्टीहरू हुन् । र, अवसरवादी पार्टीहरू हुन् । एउटा त प्रतिक्रियावादी दलाल पुँजीवादको प्रतिनिधि नै भइहाल्यो । अर्को, घोर अवसरवादी दक्षिणपन्थी नेतृत्व भएको पार्टी हो । दलाल पुँजीवाद र दक्षिणपन्थी अवसरवादको गठबन्धन । यो ढंगको गठबन्धन सरकार बनेर उसले के धृष्टता गर्दै छ भन्दा दुई पार्टी सिस्टम बनाउने । जुन कुरो मलाई लाग्छ, यो सूर्यमुनि असम्भव छ । कम से कम नेपालमा चाहिँ असम्भव छ । यो उनीहरूको ख्याली पुलाउबाहेक अरू केही होइन र हुनेवाला पनि छैन । अब यो देशमा मल्टी पार्टी सिस्टम स्थापना भएको छ । यो पुँजीवादी मल्टी पार्टी सिस्टम हो । पुँजीवादमा मल्टी पार्टी सिस्टम त्यसको अन्तिम अवस्थासम्म रहन्छ । यो मल्टी पार्टी सिस्टमलाई यही प्रक्रियाअन्तर्गत जतिसुकै ठूलो पार्टी किन नहोस्, एउटैले दुईतिहाइ लिएर आए पनि सम्भव छैन । हामीसँग थियो नि हिजो दुईतिहाइ बहुमत, हामी पनि सक्दैनौँ । अब उनीहरूले त्यो कल्पना मात्रै हो । अहिले उनीहरू संविधान संशोधनको हल्ला फिँजाइरहेका छन् । संविधान संशोधनको हल्ला जतिसुकै पिटाए पनि दुई वर्षसम्म उनीहरूले एक्लै अगाडि बढ्न खोजे भने यो संविधानको न कमा चेन्ज गर्न सक्छन् न फुलस्टप चेन्ज गर्न सक्छन् । हाम्रो सहयोगबिना केही पनि गर्न सक्दैनन् । उनीहरूले जतिसुकै नचाहे पनि हाम्रो सहयोगबिना उनीहरूले गर्न सक्ने अवस्था देखिँदैन ।