कटारीमा आमा छोराको हत्या

काठमाडौं । उदयपुरको कटारी नगरपालिका-१० स्थित सोरुङ छविसेमा आमा छोराको हत्या भएको छ ।

वडा कार्यालय नजिकै किराना पसल गर्दै आएकी अन्दाजी ४० वर्षिया निर्मला थापा र उनका छोरा अन्दाजी ६ वर्षिय आरुस थापाको आज बिहान पसलमै शव भेटिएको प्रहरीले जनाएको छ ।

आमाको शव भुईँमा घोप्टो परेको र छोराको खाटमा रगतमा डुबेको अवस्थामा फेला परको वडाध्यक्ष क्षेत्रबहादुर खड्काले बताएका छन् । उनीहरुको त्यो अवस्था पसलमा आउने ग्राहाकले भेटेको खड्काले जानकारी दिए ।

घटनास्थल कटारी बजारबाट ३२ किलोमिटर उत्तर पहाडी भेगमा पर्दछ । वडाध्यक्ष खड्काका अनुसार मृतक निर्मला थापाका श्रीमान अशोक थापा दुईवर्ष अघि कान्छी श्रीमती लिएर भारततिर गएका थिए ।

घटना स्थलमा प्रहरी पुगेको र यसबारे अध्ययन थालेको प्रहरीले जनाएको छ ।