यु–१९ एसिया कप क्रिकेटमा बङ्गलादेशसँग नेपालको फराकिलो हार

काठमाण्डू, संयुक्त अरब इमिरेट्स (युएई) मा जारी एसिसी यु–१९ एसिया कप क्रिकेटमा नेपालले लगातार दोस्रो हार खेपेको छ ।

समूह ‘बी’ अन्तर्गत आइतबार भएको खेलमा नेपाल बङ्गलादेशसँग पाँच विकेटले पराजित भयो ।

जितका लागि एक सय ४२ रनको लक्ष्य पछ्याएको बङ्गलादेशले २८.४ ओभरमा पाँच विकेटको क्षतिमा लक्ष्य पूरा गरेको हो ।

बङ्गलादेशका लागि ओपनर जवाड अबररले ५९ रन बनाए । कप्तान अजिजुल हासिकमले अविजित ५२ र फरिद हसनले १३ रन बनाए ।

बलिङमा नेपालका युवराज खत्रीले चार विकेट लिए । उनले ६ ओभरमा २३ रन खर्चिएर उक्त विकेट लिएका हुन् ।

हेमन्त धामीले एक विकेट झारे । यसअघि दुबई अन्तर्राष्ट्रिय रङ्गशालामा टस हारेर पहिले ब्याटिङको निम्तो पाएको नेपालले ४५.४ ओभरमा सबै विकेटको क्षतिमा एक सय ४१ रन बनाएको थियो ।

नेपालका लागि ओपनर आकाश त्रिपाठीले सर्वाधिक ४३ रन बनाए । उत्तम रङ्गु थापामगर र अभिषेक तिवारीले २९/२९ रन बनाए । अन्य खेलाडीले दोहोरो अङ्कमा रन बनाउन सकेनन् ।

नेपाललाई सस्तैमा समेट्न बङ्गलादेशका अल फहाद, मोहम्मद इकबाल हसन इमोन र रिजन हुसेनले दुई/दुई विकेट लिए ।

साद इस्लाम रजीन, मोहम्मद रफी उज्जामान र मोहम्मद अजिजुल हाकिम तमिमले एक एक विकेट झारे ।

नेपाल पहिलो खेलमा श्रीलङ्कसँग ५५ रनले पराजित भएको थियो । नेपालले अब समूहको अन्तिम खेल मङ्गलबार अफगानिस्तानसँग खेल्नेछ ।

लगातार दुई हारसँगै नेपालको सेमिफाइनल पुग्ने सम्भावना सकिएको छ ।

समूह ‘ए’ मा आयोजक युएई, भारत, पाकिस्तान र जापान रहेको छ । सेमिफाइनल खेल मङ्सिर २१ र फाइनल खेल २३ गते हुनेछ ।