ऋण लिएर कुनै पनि परियोजना बनाउन कांग्रेसले दिँदैन, ऋणको पासोमा पर्न दिइन्न् : महामन्त्री थापा

  Sampatti News Online

December 7, 2024

विराटनगर, नेपाली कांग्रेसका महामन्त्री गगन थापाले ऋण लिएर कुनै पनि परियोजना बनाउन अब कांग्रेसले नदिने प्रस्ट पारेका छन् ।

बीआरआई कार्यान्वयन सम्झौताप्रति लक्षित गर्दै महामन्त्री थापाले भने, ‘यो सम्झौतालाई संसदमा पनि लगेर छलफल गरौं ।

भोलिका दिनमा ऋण लिएर कुनै पनि परियोजना बनाउन कांग्रेसले दिँदैन, यो कुरा म प्रस्ट रुपमा भन्न चाहन्छु र प्रत्येक कांग्रेसको सदस्यले यति भन्न सक्नुपर्छ ।
भोलि हामी सरकारमा नभए पनि कम्युनिष्टहरु मिलेर सरकार बनाए भने पनि यो सम्झौतामा टेकेर कांग्रेसले भन्न सक्छ, देशले ऋण लिन सक्दैन ।’

कांग्रेस कोशी प्रदेशस्तरीय सम्मेलनलाई शनिबार विराटनगरमा सम्बोधन गर्दै महामन्त्री थापाले कांग्रेसले विदेशी ऋण लिएर परियोजना निर्माण गर्न नदिने बताएका हुन् ।

उनले अहिलेसम्मको सबैभन्दा खराब ऋण पोखरा विमानस्थल निर्माणको रहेको भन्दै देशलाई श्रीलंका, पाकिस्तानलगायतका देशहरुको जस्तो ऋणको पासोमा पर्न कांग्रेसले नदिने प्रस्ट पारे ।

प्रकाशित मिति:December 7, 2024