December 9, 2024
काठमाण्डू, एनपीएलमा कप्तान रोहितकुमार पौडेलको अलराउण्ड प्रदर्शनमा लुम्बिनी लायन्सले पहिलो जीत हासिल गरेको छ ।
रोहितले ब्याटिङ र बलिङमा उत्कृष्ट प्रदर्शन गर्दा लुम्बिनीको पहिलो जीत सम्भव भएको हो ।
रोहितले ब्याटिङको क्रममा ८० रनको योगदान गर्दा बलिङमा १७ रन खर्चेर ४ विकेट लिएका हुन् ।
यससँगै लुम्बिनीको प्लेअफ पुग्ने सम्भावना जीवित रहेको छ । एनपीएलमा अब लुम्बिनीले लिग चरणमा काठमाण्डु गुर्खाज र कर्णाली याक्ससँग प्रतिस्पर्धा गर्न बाँकी छ ।
यी दुवै खेलमा जीत हासिल गर्दै लुम्बिनीले प्लेअफ पुग्न थप अन्य खेलमा नतिजामा पनि भर पर्नुपर्ने छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा मंगलबार भएको खेलमा लुम्बिनीले चितवनलाई ३३ रनले हरायो ।
लुम्बिनीले दिएको १६८ रनको लक्ष्य पछ्याएको चितवन पूरै ओभरमा ८ विकेट गुमाउँदै १३४ रनमा समेटियो ।
चितवनका लागि लुक बेन्केनस्टाइनले ३१ रन बनाए । कप्तान कुशल मल्लले २०, रवि बोपाराले १२ र सन्तोष कार्कीले १० रन बनाउनुबाहेक अन्य खेलाडी गतिलो प्रदर्शन गर्न सकेनन् ।
लुम्बिनीका लागि रोहितले ४, रामोन सिमन्ड्सले २ तथा अभिषेश गौतम र साद विन जफरले एकरएक विकेट लिए ।
यसअघि टस हारेर ब्याटिङ गरेको लुम्बिनीले पूरै ओभर खेलेर ६ विकेटको क्षतिमा १६७ रन बनाएको थियो ।
लुम्बिनीका लागि कप्तान पौडेलले अर्धशतकीय पारी खेले । उनले ५७ बलमा ६ चौका र ५ छक्का प्रहार गर्दै ८० रनको योगदान गरे । साद बिन जफरले ५२ रन बनाए ।
सुरुवातमा ४ विकेट गुमाएर धरापमा आएको लुम्बिनीको ब्याटिङलाई रोहित र जफरको शतकीय साझेदारी गर्दै टोलीलाई सम्मानजनक स्कोरमा पुर्याएका थिए ।
५ विकेटका लागि ६४ बलमा रोहित र जफरले १०० रनको साझेदारी पूरा गरेका हुन् ।
अर्जुन साउदले १५ रन बनाउँदा आशुतोष घिरैया १ र उन्मुक्त चन्द शून्यमा आउट भएका थिए ।
चितवनका लागि रिजन ढकालले ३ तथा कुशल मल्ल र रञ्जितकुमारले १–१ विकेट लिए । चितवनका लागि नरबहादुर सार्कीले डेब्यू गरेका छन् । उनले २ ओभर बलिङ गर्दै १८ रन खर्चेका छन् ।
प्रकाशित मिति:December 9, 2024
December 11, 2024
