December 18, 2024
काठमाण्डू, नेपाल प्रिमियर लिग (एनपिएल) को दोस्रो क्वालिफायरमा कर्णाली याक्सले जनकपुर बोल्ट्सलाई १ सय १९ रनको लक्ष्य दिएको छ ।
कीर्तिपुरस्थित त्रिवि मैदानमा टस हारेर ब्याटिङको मौका पाएको कर्णालीले निर्धारित २० ओभरमा ९ विकेट गुमाएर १ सय १८ रन बनायो ।
उसका लागि गुलशन झाले २५, देव खनालले २४, विलियम बोसिस्टोले १४, जीशान मक्सूदले १२ रन बनाए । बाँकी ब्याटरले भने दोहोरो अंकमा समेत रन जोड्न सकेनन् ।
जनकपुरका लागि मोहम्मद मोहसिन, ललितनारायण राजवंशी र जिमी नीशमले दुई/दुई तथा शेर मल्ल र हर्ष ठाकरले एक/एक विकेट लिए ।
कर्णाली र जनकपुरका लागि फाइनल पुगेर उपाधि होडमा रहने अन्तिम मौका हो । लिग चरणमा जनकपुरविरुद्ध सुदूरपश्चिम ७२ रनले विजयी भएको थियो ।
जनकपुर आज कर्णालीलाई हराएर तेस्रोपटक सुदूरपश्चिसँगको भेट पक्का गर्ने योजनामा छ ।
उता कर्णाली आफ्नो लय कायम राख्दै जनकपुरलाई स्तब्ध पारेर फाइनलको यात्रा गर्ने योजनामा छ ।
यस्तै, ऊ जनकपुरविरुद्ध लिग चरणको बदला पनि लिन चाहन्छ । लिग चरणको खेलमा जनकपुरले कर्णालीलाई ८ विकेटले हराएको थियो ।
प्रकाशित मिति:December 18, 2024
