गाउँपालिकाका तत्कालीन अध्यक्ष, प्रमुख प्रशासकीय अधिकृत र वडा अध्यक्षसहित सात जनाविरुद्ध भ्रष्टाचार मुद्दा

काठमाडौँ । अख्तियार दुरुपयोग अनुसन्धान आयोगले पालिका अध्यक्ष, प्रमुख प्रशासकीय अधिकृत र वडा अध्यक्षसहित सात जनाविरुद्ध भ्रष्टाचार मुद्दा दायर गरेको छ ।

आयोगले बझाङको खप्तडछान्ना गाउँपालिकाका तत्कालीन अध्यक्ष वर्कबहादुर रोकाया, निमित्त प्रमुख प्रशासकीय अधिकृत, वडा अध्यक्षसहित ७ जनाविरुद्ध भ्रष्टाचार मुद्दा दायर गरेको छ ।

गलत लिखत तयार एवं सरकारी कागजात नोक्सान गरी भ्रष्टाचार गरेको आरोपमा उनीहरूविरुद्ध बुधबार विशेष अदालत काठमाडौंमा मुद्दा दायर गरिएको आयोगले जनाएको छ ।

आयोगका प्रवक्ता राजेन्द्रकुमार पौडेलका अनुसार गाउँपालिका वडा नम्बर ४ स्थित सिम्लका घट्ट सिँचाई कुलो निर्माणमा अघिल्लो वर्ष सम्पन्न भएको कामको आर्थिक वर्ष २०७७/०७८ मा कुनै पनि काम नगरी भुक्तानी लिएको भन्ने उजुरी आयोगमा परेको थियो ।

आयोगले गाउँपालिकाका तत्कालीन अध्यक्ष रोकाया, तत्कालीन वडा अध्यक्ष भीमबहादुर रोकाया, तत्कालीन निमित्त प्रमुख प्रशासकीय अधिकृत दीपककुमार रावल, तत्कालीन इन्जिनियर सुरेन्द्रबहादुर खाती, तत्कालीन प्राविधिक असिस्टेन्ट इन्जिनियर जनक थापा मगर, तत्कालीन लेखापाल मदनराज जोशी र​ सिम्लका घट्ट सिँचाई कुलो योजनाको उपभोक्ता समितिका तत्कालीन अध्यक्ष शमशेर रोकाया मुद्दामा प्रतिवादी बनाएको छ ।