काठमाडौंमा समाजवादी मोर्चा र पूर्वराजा समर्थकहरुको शक्ति प्रदर्शन, यस्तो देखियो काठमाडौंको सडक

काठमाडौं । गणतन्त्रवादी र राजावादीहरूले काठमाडौं उपत्यकामा आज गर्न लागेको प्रदर्शन सुरु नहुँदै काठमाडौंको यातायात व्यवस्था प्रभावित भएको छ ।

गणतन्त्र पक्षधर समाजवादी मोर्चा र पूर्वराजा समर्थक समूहले छुट्टाछुट्टै प्रदर्शन गर्नेछन्। समाजवादी मोर्चाले प्रदर्शनीमार्गमा शक्ति प्रदर्शन गर्ने भने पूर्वराजा समर्थकले तीनकुनेमा जुलुस निकाल्ने छन्।

सडकमा ठूलो संख्यामा प्रहरी परिचालन गरिएको छ । सुरक्षा दृष्टिकोणबाट, उपत्यका प्रहरी कार्यालयले उच्च सतर्कता अपनाएको छ। तीनकुने र प्रदर्शनीमार्ग क्षेत्रमा प्रहरी परिचालन गरिने छ। ३५०० प्रहरी, सादा पोसाकका सुरक्षाकर्मी र ट्राफिक डाइभर्ट गर्दा सुरक्षा संयन्त्रलाई उच्च तयारीमा राख्ने योजना बनाइएको छ।

समाजवादी मोर्चामा नेकपा माओवादी केन्द्र, नेकपा एकीकृत समाजवादी, नेपाल समाजवादी पार्टी र नेत्रविक्रम चन्द ‘विप्लव’ नेतृत्वको नेकपा सहभागी छन्। उनीहरूले भृकुटीमण्डपदेखि प्रदर्शनीमार्गसम्म र्‍याली निकाल्नेछन्।

पूर्वराजा समर्थक समूह ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ र ‘राजसंस्था पुनर्स्थापनाका लागि संयुक्त जनआन्दोलन समिति’का आयोजनामा प्रदर्शन गर्नेछन्।

काठमाडौंका प्रमुख प्रदर्शनस्थलहरूमा सुरक्षा व्यवस्था कडा राख्ने छ ताकि कुनै अप्रिय घटना रोक्न सकियोस्।