कम्पनीका अध्यक्ष पौडेलसहित ८ जनाविरुद्ध भ्रष्टाचार मुद्दा दायर 

काठमाडौं । नेपाल पुनर्बिमा कम्पनीका अध्यक्ष सुरेन्द्रकुमार पौडेलसहित ८ जना विरुद्ध भ्रष्टाचार मुद्दा दायर भएको छ ।

उदयपुर सिमेन्ट कम्पनीको महाप्रबन्धक हुँदा भ्रष्टाचार गरेको अभियोगमा पौडेलसहित ८ जनाविरुद्ध अख्तियार दुरुपयोग अनुसन्धान आयोगले मुद्दा दायर गरेको हो ।

आयोगका अनुसार पौडेल उदयपुर सिमेन्ट उद्योग लिमिटेडको महाप्रबन्धक पदमा कार्यरत रहँदा पदको दुरुपयोग गरी गैरकानुनी लाभ लिएको ठहर गरिएको छ। सो प्रकरणमा पौडेलबाट मात्रै १२ करोड ४७ लाख २२ हजार रुपैयाँ बराबरको बिगो असुल उपर गर्न माग गरिएको छ।

यसअघि पनि करिब दुई वर्षअघि पौडेलमाथि आयोगले अर्को मुद्दा दायर गरेको थियो। उक्त मुद्दामा उनी अदालतबाट सफाइ पाएका थिए। त्यसपछि गत भदौ महिनामा उनी नेपाल पुनर्बिमा कम्पनीको अध्यक्ष पदमा नियुक्त भएका थिए। हाल नयाँ मुद्दा दर्ता भएसँगै प्रचलित कानुनी व्यवस्थाअनुसार उनी पदबाट निलम्बित भएका छन्।

उक्त मुद्दामा पौडेलसँगै उदयपुर सिमेन्ट उद्योगसँग सम्बन्धित नवलकिशोर साहलगायत अन्य व्यक्तिहरूलाई समेत प्रतिवादी बनाइएको विशेष अदालतले जनाएको छ।