‘पिलोको खिल’ बन्ने हो कमरेड ?

चमिना भट्टराई

लामो समयको मतभेद र अन्तरसंघर्षपछि २ भदौदेखि नेकपा एमाले विभाजन वैधानिक प्रक्रियामा गएको छ । कमरेड माधवकुमार नेपालको नेतृत्वमा नेकपा (एकीकृत समाजवादी) पार्टी दर्ताको प्रक्रियामा छ । पार्टी विभाजन वैधानिक प्रक्रियामा गइसकेको अवस्थामा पनि एमालेकै एकाथरी नेताहरू अझै पनि एकताको प्रयासमा छन् । यति बेला तेस्रो धार भनेर चिनिएका दोस्रो पुस्ताका केही नेता पार्टी एक बनाउने अभियान भनरे बीच धारमा बसेका छन् । तर, एमालेका अध्यक्ष केपी शर्मा ओली र उनी पक्षीय नेताहरूले भने माधवकुमार नेपालसहित पार्टी एकताको सम्भावना सकिएको बताउँदै आएका छन् । एकाथरी एकता एकता भन्दै हिँडने अर्को थरी एकता सकिएको भन्दा एकता पक्ष भनेर देखिएको नेताहरूको प्रयास के हुन्छ अन्यौलमा छ ।

एकता अभियानमा लागेका नेताहरूले मंगलबारका लागि केपी ओलीलाई पार्टी एकताका लागि भन्दै अन्तिम अल्टिमेटम दिएका छन् । तर, अहिलेसम्म ओली र उनी निकट नेताहरूको अभिव्यक्ति सुन्दा पार्टी एकता हुने लक्षण छैन । एकता भन्दै बीच धारमा बसेका नेताहरू यति बेला आलोचनाका पात्रसमेत बनेका छन् । केही भने अब पार्टीलाई फुटबाट जोगाउन नसकिने भन्दै निरास भएका छन् । लामो समय माधव नेपाललाई साथ दिएका र पार्टी फुटाउन जोडबल गर्ने नेताहरू नै अहिले नै पार्टी विभाजनन गर्न नहुने बताउन थालेका छन् । उनीहरूका उत्तेजित अभिव्यक्ति र सक्रियताले एमाले विभाजनका लागि बल पुगेको थियो । तर, के कारणले अहिले एकताका नाममा आफूले चाहेको विभाजनबाट ती नेताहरू पछि हटे बुभ्mन सकिएको छैन ।

यति बेला धेरैले प्रश्न गर्न थालेका छन्, ‘पहिले नेपाल पक्षमा रहेका तपाईं नौ जना स्थायी समिति सदस्यले किन नेपालको साथ छोडनुभयो ?’ तपाईंका चर्का भाषण किन मलिन बने? के कुरा छन् जसले तपाईंलाई तातेको अवस्थाबाट एकैपटक बरफमा परिणत गर्यो ? यस्ता अनगिन्ति प्रश्न छन् यतिबेला नयाँ पुस्ताका धेरैले हिजोसम्म भरोसा गरेको ती नेताहरूसँग । तपाईंहरूका एकता प्रयासलाई बेवास्ता गर्दै आएका कमरेड केपी ओलीको मन पग्लेला भन्नेमा विश्वास छ? उनी र उनी निकट नेताहरूले पटकपटक एकता सम्भावना छैन भन्दा भन्दै किन बालुवा पेलेर तेल निकाल्ने प्रयास गर्दै हुनुहुन्छ ? यसरी अहिले तपाईंहरू समय मात्रै होइन आफ्ना स्वर्णिम सयमलाई समेत बर्बाद गर्दै हुनुहुन्छ त्यसमा हेक्का राख्नुस् ।

केही दिनअघि एमाले सचिव प्रदीप ज्ञवालीले ‘माधव नेपालसहितको एकताको च्याप्टर क्लोज भयो,’ भनेका छन् । यसले एमालेका अध्यक्षदेखि कुनै पनि नेता एमाले एकता होस् भन्ने चाहँदैनन भन्ने प्रष्ट देखिन्छ । फेरी पनि तपाईंहरू किन के का लागि लत्रँदै हुनुहुन्छ कमरेड? कहिलेकाहीँ तपाईंहरू आफैँले भन्ने गर्नुभएको छ, ‘ओलीले नै पार्टी टुक्राउन चाहेकाले आफूहरूको प्रयास खेर गयो ।’ यही निष्कर्ष तपाईंहरूको हो भने किन लाग्नु हुन्न माधव नेपालको साथमा ? हिजो जसरी पार्टी विभाजनको विकल्प छैन भनेर लाखौँ नेता कार्यकर्ताका बीचमा जानु भयो त्यसै गरी अब नयाँ बन्दै गरेको पार्टी निर्माणमा लाग्नुस् । होइन भने तपाईंका हिजोका अभिव्यक्ति र पार्टी फुटाउन गर्नुभएको जोडबल कहाँनिर गएर चुक्यो ? के कारण हुन् आज तपाईंका कारण यहाँसम्म पुगेका कमरेड माधवलाई साथ दिन नसक्नु ?

‘माधव नेपालसहित १४ नेतामाथिको कारबाही र एकतासँगै हुँदैन । ओलीजीले माधव नेपालबाहेकको एकता चाहेको बुझियो । त्यो भनेको पार्टी टुक्रियोस् भन्ने हो, १४ नेताको कारबाही फिर्ता नभए एमाले एक रहँदैन । एकता भड्कदै छ ।’ यस्तै यस्तै भन्दै हिँडने अनि फेरी कमरेड ओलीले नचाहेको एकताको पछि लत्रने कुन सिद्धान्त हो तपाईंहरूको? यस्ता धेरै कुरा छन् जहाँ एमालेले नचाहेको एकताका पछि तपाईंहरू आँखामा पट्टी बाँधेर लाग्नुभएको छ । माओवादीसँग एकता भएर नेकपा बनेदेखि कहिले कसलाई काखी च्याप्ने कहिले कसलाई हुत्याउने काम लामै चल्यो ।

अहिलेसम्मको अवस्था हेर्दा कमरेड ओली हरेक कुरामा प्रतिशोधपूर्ण रूपमा लागेको देखिन्छ । आफ्नो स्वार्थ पूरा गर्न जे सुकै गर्ने, अरूलाई मानमर्दन गर्ने र कसैको अस्तित्व स्वीकार न गर्ने सोचले आज ठूलो सम्भावना रहेको नेकपा एमाले तीन वटा टुक्रा बन्ने अवस्थामा पुग्दा पनि उल्टै एकता भन्दै आफ्नै दैलोमा पुगेकालाई दुर्कारेर पठाउनुभयो । एकताका नाममा रमिता गरेको आरोप लाग्यो ती नेतालाई तैपनि तपाईंहरू लत्रि रहनुभयो । सोमबार दिउँसोको मात्रै कुरा गर्ने हो भने पनि कमरेड ओली १० बुँदेमा फर्कन तयार भएको सन्देश आयो । आफैैले काम छैन भनेको १० बुँदेमा किन फर्कन लाग्नुभयो? अनि ०७५ जेठ ३ देखि आजसम्म तपाईंले बोलेको र कबुल गरेका के के कुरा पूरा भए ? आफू तल पर्ने अवस्थामा जे पनि मान्छु भन्ने माथि परेपछि सबै कुरा हावामा उडाउने तपाईंको रणनीति अब पनि कसैले बुझ्न बाँकी होला र ? अहिलेसम्म सहमति गरियो कति पूरा भए रु अर्कोतर्फ माधव नेपालको सहमतिविना गरिएको १० बुँदे कसका लागि कार्यान्वयन गर्ने सहमति गरिँदै छ ?

एमाले माओवादी बीचको एकतादेखि आजसम्मको अवस्था हेर्दा तपाईंले कोकोलाई पार्टी र सरकारको नेतृत्व सुम्पने वचन दिनुभयो र केके वचन पूरा भए रु ‘फुटाउ र राज गर’ को सिद्धान्त बोकेका तपाईंले आफूलाई शक्तिमा टिकाइराख्न दिएका आश्वासनको फेरिस्त निकाल्ने हो भने लामै हुन्छ । एकैदिन एकै पद कति जनालाई बाँड्नुभयो? राजनीति त्यसमा पनि पार्टी चलाउन गरिने यस्ता चालबाजीले अरूलाई होइन, आफैंलाई सिध्याउँछ भन्ने कुराको तपाईं र तपाईंलाई घेराबन्दीमा राख्नेले नबुझेको कि अरूलाई बेबकुफ बनाउने प्रयासलाई निरन्तरता दिएको ?

हुँदा खाँदाको सक्लो पार्टी फेरी एक बनाएर लैजाने भनेर हिँडेका नेतालाई ‘पिलोको खिल’ भनेर अपमान गर्दा पनि खिल बन्न तयार हुनेको किन मान मर्दन गरियो ?‘केपी कमरेड माधव नेपालबाट हामीलाई फुटाउने योजनामै हुनुहुन्छ,’ तेस्रो धराका नेताले भन्ने गरेका छन् । यदि यो कुरा तपाईंहरूलाई थाहा छ र उहाँ कुनै पनि हालतमा एकता चाहनु हुन्न भने किन हात जोडेर लालसलाम भन्नुहुन्छ? मुठी उठाएर लालसलाम भन्नुस् र लागौँ कमरेड माधवले दर्ता गराउनुभएको पार्टी बनाउने अभियानमा । समय र अवसरलाई सही रूपमा लागू गरौँ । हामीलाई तपाईंहरूका शब्दशब्द याद छ । ‘ओली कहिल्यै सुध्रन सक्दैनन्’ नैतिकता र ओली एकैठाउँ हुनै सक्दैन ।’ हामीले भन्दा कमरेड ओलीलाई तपाईंहरूले बढी चिन्नुभएको थियो र त्यसै अनुसार प्रतिगमनका विरुद्ध लाग्न उत्प्रेरित गर्नुभयो । माधव नेपालसहित ठूलो समूहलाई छोड्दै हिजोका सबै कुरा भुलेझैँ गरेर बुहारी झारजस्तो बन्ने प्रयास नगर्नुस् । के तपाईंहरू पिलोको खिल बन्न तयार हो त कमरेड ।

कमरेड ओलीले दुई वटा प्रदेश सरकार गुमाउँदा र आफैं सत्ताबाट बाहिरिँदासम्म गर्न नचाहेको १० बुँदे एकाएक सोमबार कसरी कार्यन्वयन गर्छु भन्नुभयो? कतै संसद् विगठन सम्बन्धमा असार २८ गते अदालतबाट हुन लागेको फैसला प्रभाव पार्न २७ गतेको गरिएको नाटकजस्तै निर्वाचन आयोगमा बुधबार हुने पार्टी दर्ता सनाखत प्रभाव पार्ने अर्को चाल त होइन यो ? यस्ता चालबाजीमा कमरेड ओली र उनका आसेपासे निकै चतुर छन् । यस्ता हर्कत पहिला पनि भए र फेरी पनि नहोला भन्न सकिन्न । यदि त्यस्तो भयो भने कमरेड ओलीसँगै तपाईंहरूले गर्नुभएको प्रयास र भूमिकामा कति प्रश्न उठ्ला? माधवलाई पार्टी फुटाउन ढिला भयो, तलका कार्यकर्ता छट्पटाए, आजै फुटाउँ भोलि फुटाउ भनेर यहाँसम्म पुर्याउन तपाईंहरू कहाँबाट चल्नुभएको थियो ? होइन भने आज एकाएक तपाईंका पाइला किन रोकिए ? नेकपा एमालेमा ०७५ जेठ २ अघिकै अवस्थामा तपाईंहरूको भूमिका र सक्रियता हुन्छ होला भन्नेमा विश्वास कहाँबाट पलायो? तपाईंहरूकै भाषामा दुईपटक संसद् विगठन गर्ने प्रतिगामी, नेपालबाट कम्युनिस्ट आन्दोलन समाप्त पार्न कम्मर कसेर लाग्नुभएको जस्ता अनगिन्ती आरोप लागेको कमरेड ओलीलाई आज केका आधारमा, कुन मुद्दामा, कसरी स्वीकार गर्न तयार हुनुभयो ? हाम्रा यस्तै हजारौँ प्रश्नका जवाफ दिनुपर्छ र यो बीचमा पार्टी