आजदेखि ‘हेलो सरकार’ २४सै घण्टा सञ्चालन, अब राति पनि गुनासो टिपाउन सकिने

सर्वसाधारणको गुनासो सुन्न सरकारले शुरू गरेको ‘हेलो सरकार’ अब २४सै घण्टा सञ्चालन हुने भएको छ ।अब टेलिफोन र इन्टरनेटको माध्ययमबाट सर्वसाधारणले सरकारी सेवा प्रवाह सम्बन्धमा २४सै घण्टा गुनासो गर्न पाउने भएका छन् । 

१२ वर्ष अघि वाबुराम भट्टराई प्रधानमन्त्री हुँदा शुरुवात भएको र बीचमा सुस्ताएको हेलो सरकार पुन व्युताइएको छ ।   प्रधानमन्त्री पुष्पकमल दाहालले हेलो सरकारको समुद्घाटन गर्दै अब तीन सिफ्टमा, २४ सै घण्टा सुचारु हुने भएको छ । आज एक समारोहबीच हेलो सरकारको शुभारम्भ गरिएको हो । जहाँ मुख्यसचिव, सचिवहरू, विभागीय प्रमुखहरू, मन्त्रालय तथा केन्द्रीय निकायका गुनासो सुन्ने अधिकृतहरू, हेलो सरकार कक्षमा कार्यरत कर्मचारीहरू सहभागी थिए ।

सुस्ताएझैं देखिएको हेलो सरकारलाई प्रविधि, जनशक्ति र सामग्रीले सुसुज्जित गर्दै गुनासो व्यवस्थापनको आधुनिक र उच्चस्तरीय संयन्त्रको रूपमा विकास गरिएको प्रधानमन्त्री प्रचण्डले बताए ।

समारोहमा प्रधानमन्त्री प्रचण्डले हेलो सरकार कक्ष व्यवस्थित भएको,पुरानो निर्देशिका संशोधन गरिएको बताए । उनले सञ्चारका विभिन्न माध्यमबाट २४ सैं घण्टा आम नागरिकले गुनासो, जिज्ञासा वा सुझाव दिन सकिने व्यवस्था गरिएको छ। हेलो सरकार व्यवस्थापन प्रणालीलाई थप प्रभावकारी बनाउन प्रत्येक सिफ्टमा उपसचिवहरूको नेतृत्वमा ३ सिफ्ट सञ्चालन हुने गरी व्यवस्था मिलाइएको छ। पहिलो चरणमा विभिन्न दर्जाका कर्मचारीहरू खटाइएको छ।